Robotika bied aan leerders die geleentheid om ‘n rekenaartaal aan te leer en dit terselfdertyd prakties op verskillende soorte elektroniese toestelle te implimenteer. Op hierdie manier ontwikkel die leerder ‘n vaardigheid om probleme op te los en krities oor aspekte te dink. Om soos ‘n rekenaar te kan dink, beteken kortliks dat die leerder groot take in kleiner dele kan verdeel, foute kan opspoor en oplos, asook alternatiewe oplossings kan ontwikkel indien nodig. Hierdie denkwyse en vaardighede is noodsaaklik vir sukses in onder andere ingenieurswese en elektronika.

Die kursus sluit die volgende in:

● Arduino mikro-kontroleerderteorie

● Digitale- en analoogtoevoer- en afvoerkontroles

● Outomatisering en sisteemintegrasie

● Die grondbeginsels van stroombane en dataprosessering

● Elektroniese teorie vir die implementering van infrarooisensors, gonsers (“buzzers”), temperatuursensors, “servo motors” en waterpompe.

● Die grondbeginsels in Python, wat fokus op veranderlikes, “debugging” lusse (“loops”), funksies en “libraries”.

Watter voordele hou kodering in vir leerders wat nie na skool programmering wil gaan studeer nie?

Kodering leer ‘n leerder logika en volharding. Beide vaardighede is belangrik om skoolprestasie in veral rekeningkunde, wiskunde en wetenskap te bevorder. Kodering as buitemuurse aktiwiteit help ‘n leerder om die digitale kloof met gemak te oorbrug. Leerders leer deur tegnologie om kreatief betrokke te wees by die leerproses.

HANNALIE VAN DER MERWE SE PASSIE OM TE DIEN

Me. Hannalie van der Merwe is reeds sedert 2000 ‘n gewaardeerde onderwyseres by die Hoërskool Strand. Die vakbond Solidariteit wat op 22 Junie 1902 gestig is, het me. Van der Merwe as onderwyser van die jaar in die hoërskoolafdeling aangewys. Dit is ongetwyfeld ‘n enorme eer vir Hoërskool Strand én die gemeenskap. Dié toekenning onderstreep die feit dat die Strand vir sy leerders omgee.

Solidariteit vind homself binne die Christelike tradisie van vakbondwese wat glo dat hulle hul lede moet lei tot selfstandigheid sodat hulle hul roeping kan navolg. Dit is juis dit wat me. Van der Merwe vermag het: Sy het haar roeping gevolg om ‘n verskil in mense se lewens te maak. Die status van ‘n onderwyser lê in ‘n kind se hart, ‘n waarheid wat Hannalie alte goed begryp.

Sy is tydens die Junie – vakansie deur die skool se toutrekouers en –leerders vir hierdie gesogte toekenning genomineer. Veral die WP se president van die Toutrekvereniging was baie opgewonde oor hierdie benoeming. Die hoof van die Hoërskool Strand, mnr. D.B. Malan, het haar ook aangemoedig om hierdie benoeming te aanvaar.

Na die aanvaarding van die benoeming moes sy ‘n outobiografie oor haarself skryf, asook ‘n video maak waarin daar op die volgende gefokus moes word:

•  Waarom sy haarself in die onderwys bevind;
•  Wat sy die meeste in die onderwys geniet en
•  Wenke vir nuwe onderwysers.

Hannalie se filosofie is baie eenvoudig: Sy doen maar net haar werk. Elkeen wat sy of haar werk doen, én dit met liefde doen, is ‘n held(in).

“Alles is net onverdiende genade uit God se liefdevolle hand”, aldus hierdie beskeie dienares. Die Hoërskool Strand eer hierdie onderwyseres wat ‘n baken van hoop vir talle leerders is.